Мәҙәни код хаҡында фекер алыштылар

"Ҡатын ҡыҙ бәхете биләмәһе” форумында мәҙәни кодты һаҡлау тураһында фекер алыштылар.

Һөйләшеүҙә «Бәхет Территорияһы» хәйриә фондының попечителлек советы рәйесе Каринэ Хәбирова, Дәүләт Думаһының бюджет һәм һалымдар буйынса комитеты рәйесе урынбаҫары Наталья Орлова, Рәсәйҙең халыҡ артисы Анита Цой, «Бизнес ҡатын-ҡыҙҙары» Ассоциацияһы президенты Марика Абдразаҡова һәм башҡа ҡунаҡтар ҡатнашты.

- Ни өсөн тап бында, башҡорт ерендә, мәҙәниәтте һаҡлау тураһында  һөйләшәбеҙ? Башҡортостан Республикаһы уникаль – уның территорияһында 160 милләт йәшәй. Уларҙың һәр береһе үҙ үҙенсәлеген һаҡлай. Был, ысынлап та, ҡыҙыҡлы тәжрибә, уны  бөтә донъяға күрһәтергә кәрәк, тип иҫәпләйбеҙ, - тип билдәләне Каринэ Хәбирова.

Рәсәйҙең халыҡ артисы, Дон техник университеты базаһындағы креатив индустриялар институты директоры Анита Цой үҙенең сығышында Өфөлә һәм тотош республикала традицияларға һаҡсыл ҡарауҙарын билдәләне.

-  Һеҙҙең күп милләтле төбәгегеҙҙә йолаларға айырыуса һаҡсыл ҡарайҙар. Бында йәшәгән төрлө халыҡтарҙың берҙәм йәшәүҙәре илһамландыра, - тине ул. - Мәҙәниәтте һаҡлау өсөн ғәҙәттән тыш бер нәмә лә кәрәкмәй. Һәр ғаиләлә быуындан-быуынға әкиәттәр, йолалар, милли байрамдар һәм йолаларҙы тапшырыу ҙа етә. Шул саҡта мәҙәни код та йәшәйәсәк.

“Ҡатын-ҡыҙ бәхете биләмәһе” бишенсе тапҡыр уҙғарылды. Быйыл форум тәүге тапҡыр халыҡ-ара кимәлгә сыҡты - Мексика, Белоруссия, Үзбәкстандан ҡунаҡтар көтөлә. Ике көн дауамында «Һаулыҡ биләмәләре» майҙансыҡтары эшләйәсәк, унда балалар һәм өлкәндәр өсөн бушлай консультациялар алырға мөмкин. Быйыл күргәҙмә зоналары «Мәҙәни код» эгидаһы аҫтында уҙғарыла.