Айыҡ ауыл—сәләмәт территория

Район мәҙәниәт йортонда үткән сарала  Аҡъюл, Атингән, Сиҙәм, Ивановка, Әлибай, Яңы Ергән, Федоровка, Хворостянка ауылдары  “Айыҡ ауыл” конкурсының муниципаль этабына йомғаҡ яһаны. Конкурсанттар  ауылдарҙа үткәрелгән саралар тураһында видеороликтар тәҡдим итте,  башҡарылған эштәр тураһында мәғлүмәт еткерҙе.

Шуны билдәләп үтергә кәрәк,  бер нисә ай эсендә масштаблы эш башҡарылған.  Мәҫәлән, Федоровка ауылында йәшәүселәр һанаулы ваҡыт эсендә 74 сара ойоштороп, унда йәштәрҙе һәм балаларҙы ла йәлеп иткән.  Ивановка халҡы ла ҡыҙыҡлы мәҙәни һәм спорт саралары ойошторған. Бында халыҡтың сәләмәтлеген һаҡлауға ҙур әһәмиәт бирелгән.  Аҡъюлда  бәйге сиктәрендә үткәрелгән сараларҙа  ҡатнашмаған бер ир-егет тә ҡалмағандыр! 300 йыллыҡ тарихы булған ауылда малсылыҡ, умартасылыҡ, ҡымыҙсылыҡ менән шөғөлләнәләр, халыҡ кәсептәрен тергеҙеләр.  Төрлө милләт халҡының татыулығы һәм берҙәмлеге менән айырылған Яңы Ергәндә 40-ҡа яҡын сара үткән. Был ауылдан байтаҡ егеттәр махсус хәрби операцияла ҡатнаша. Шуға күрә был ауылда яугирҙарға ярҙамға ныҡ әһәмиәт бирәләр.  Сиҙәм  халҡы үҙ тарихы һәм  спортсылары менән дан тота. Быйыл унда сиҙәм һәм ҡалдау  ерҙәрен үҙләштереүҙең 70 йыллығына ҡарата  һәйкәл асылған.  Дини байрамдарға  өҫтөнлөк бирәләр.  Атингәндәр  бергәләп ауылды төҙөкләндергәндәр,  бигерәк тә  элекке ҡоҙоҡтарҙы  таҙартыуға, зыяратты тәртипкә килтереүгә, экологик өмәләргә күмәкләп тотонғандар. Уларҙың да берҙәм булыуҙары асыҡ күренә.  Әлибай халҡы ветеран  ихатаһы бәйгеһендә әүҙем ҡатнашҡан,  ҡул оҫталарының оҫталыҡ дәрестәре ойошторолған,  ололарға ярҙам күрһәтеү,  СВО-ға ярҙам итеү кеүек бихисап эштәр башҡарған. Хворостянкала  кеше әҙ йәшәй, әммә  улар күркәм эштәре менән йәш быуынға  үрнәк күрһәтәләр.  Гуманитар ылау менән оҙатыуға бихисап әйберҙәр әҙерләгәндәр.  Улы  махсус хәрби операцияла ҡатнашҡан әсәгә ярҙам итәләр.  Урындағы ФАП  халыҡтың сәләмәтлеген хәстәрләй.

 Презентацияларҙы эксперт комиссияһы баһаланы.  Уның составына  урындағы башҡорттар ҡоролтайы ағзалары, төрлө ойошма-учреждениелар,  йәмәғәт ойошмалары, киң мәғлүмәт саралары вәкилдәре индерелде. Муниципаль ойоштороу комитеты рәйесе Роза Рәсембәтова  әйтеүенсә,  районда  “Айыҡ ауыл” бәйгеһенең мәртәбәһе йылдан йыл арта.  Конкурста ҡатнашыусылар  муниципаль кимәлдә  бәйгегә йомғаҡ яһауға ла яуаплы ҡарай, ныҡлы әҙерләнә, халыҡтың был әһәмиәтле сараға  ҡарашы үҙгәрә.

Хәйбуллалар насар күренештәргә юл ҡуймаҫҡа, телебеҙҙе, нәҫелебеҙҙе һаҡларға һәм ауыл халҡы менән сәләмәт йәшәү рәүешен һайларға тигән теләктә һәм өмөттә ҡала. Ә муниципаль  этапта еңеүсе ауыл республика кимәлендә район намыҫын яҡлаясаҡ.

Тулыраҡ мәҡәләне “Хәйбулла хәбәрҙәре” гәзитенең киләһе һанында уҡығыҙ.