+10 °С
Облачно
Новости
26 Апреля 2021, 09:55
Магнитогорск ҡалаһында башҡорт мәктәбе эшен башлай
Магнитогорск ҡалаһының 5-се урта дөйөм белем биреү мәктәбе базаһында «Башҡорт теле-башҡорт иле» йәкшәмбе мәҙәни-тарихи мәктәбе проектын тормошҡа ашыра башлауға бәйле сара үтте.
2021 йылдың 24 апрелендә Магнитогорск ҡалаһының 5-се урта дөйөм белем биреү мәктәбе базаһында «Башҡорт теле-башҡорт иле» йәкшәмбе мәҙәни-тарихи мәктәбе проектын тормошҡа ашыра башлауға бәйле сара үтте. Был хаҡта Бөтә донъя башҡорттары ҡоролтайының “Бәйләнештә” социаль селтәрендәге рәсми төркөмөндә яҙалар.
Сарала Милли мәғариф идаралығының дәүләт программаларын һәм төбәк-ара хеҙмәттәшлек итеү бүлегенең әйҙәүсе белгес-эксперты Гөлсөм Дилмөхәмәтова, Рәми Ғарипов исемендәге 1-се башҡорт гимназияһы директоры урынбаҫары Фәнил Бүләков, өҫтәмә белем биреү педагогы Алмаз Такалов, Магнитогорск ҡалаһының мәғариф идаралығы начальнигы урынбаҫары Ольга Бирюк ҡатнашты.
Проектты тормошҡа ашырыу сиктәрендә хеҙмәттәшлек тураһында килешеүгә ҡул ҡуйылды. Башҡорт теле һәм мәҙәниәте кабинетын йыһазландырыу өсөн матди-техник саралар, күргәҙмә әсбаптар тапшырылды. Силәбе өлкәһенең Башҡорт ҡоролтайы етәксеһе Азамат Әхмәтҡужин менән «Көмөш ҡауырһын» әҙәби берекмәһе етәксеһе Сәфинә Хәкимова тарафынан шиғырҙар йыйынтығы тапшырылды.
Башҡорт теле, башҡорт халҡының мәҙәниәте һәм тарихы буйынса дәрестәр аҙнаһына өс сәғәт дауамында төрлө йәштәге балалар өсөн ойоштороласаҡ.
Новости партнеров
