-4 °С
Облачно
Все новости
Новости
2 Апреля 2021, 17:11
Иң яҡшы блогерҙар 10 меңлек сертификат менән бүләкләнде
Башҡорт телен үҫтереү һәм һаҡлау фонды директоры Гөлназ Йосопова блогерҙарға һәм журналистарға 10 мең һумға сертификаттар тапшырҙы.
Үткән йыл аҙағында Башҡорт телен һаҡлау һәм үҫтереү фонды Бөтә донъя башҡорттары ҡоролтайы менән берлектә башҡорт телен, мәҙәниәтен, башҡорт халҡының тарихын, замансалығын масс-медиа һәм социаль селтәрҙәрҙә популярлаштырыуға йүнәлтелгән проекттарға грант ярҙамы күрһәтеү буйынса конкурс иғлан иткәйне. Уның маҡсаты – киң мәғлүмәт сараларында һәм социаль селтәрҙәрҙә башҡорт теле тураһында контентты арттырыу, башҡорт теленә һәм халҡына ҡыҙыҡһыныу уятыу.
Конкурс быйылғы йылдың майына тиклем бара, еңеүселәр ай һайын билдәләнә. Жюри ағзалары 5 еңеүсене һайлай, улар 10 мең һумлыҡ сертификат менән бүләкләнә.
Март айының еңеүселәрен тәбрикләү тантанаһы «Шайморатовсылар - легендар 112-се Башҡорт кавалерия дивизияһы яугирҙары» биографик белешмәнең исем туйы менән берлектә үтте. Киң мәғлүмәт сараларында, социаль селтәрҙәрҙә башҡорт телен, мәҙәниәтен, тарихын үҫтереүгә йүнәлтелгән грант конкурсының өсөнсө этабында 5 проект иң яҡшыһы тип табылды. Башҡорт телен үҫтереү һәм һаҡлау фонды директоры Гөлназ Йосопова блогерҙарға һәм журналистарға 10 мең һумға сертификаттар тапшырҙы.
Еңеүселәр:
Гүзәл Ситдиҡова — «Юлдаш» каналы алып барыусыһы, «Махсус репортаж» проекты авторы;
Айгөл Шәйәхмәтова — @aigul.bashbrosh блогы авторы, «Башҡортостан тураһында биҙәүестәр» проекты; үҙе эшләгән биҙәүестәрҙә Башҡортостан тарихы һәм мәҙәниәтен сағылдыра;
Миләүшә Торсонбаева — «Инстабәпәй» https://www.instagram.com/insta_bepei/ авторы, был сәхифәлә сабыйҙар әкиәт, шиғыр, уйындар аша башҡорт телен өйрәнә, аккаунт ата-әсәләргә балаларҙы ҡыҙыҡтырыу, туған телгә һөйөү уятыуҙа ярҙам итә;
Гөлнара Хәлфетдинова — «Гөлнара Хәлфетдинова. Шиғырҙар» https://vk.com/club43551296 сәхифәһе, «Бәйләнештә» социаль селтәренә үҙенең әҫәрҙәрен һала, башҡорт телендә әңгәмәләр үткәрә;
Шәһит Хамматов — «Ил ағаһы Мортаза» https://vk.com/club.murtazarahimov сәхифәһе, «Бәйләнештә» социаль селтәрендәге ике сәхифәлә замандаштар өсөн көнүҙәк проблемалар күтәрә, фекерҙәре менән уртаҡлаша.
Фотолар Бөтә донъя башҡорттары ҡоролтайы сайтынан алынды.
Новости партнеров