Ҡаршы алығыҙ – яңы китаптар!

Һуңғы ике көн күңел һыуһынын ҡандырырҙай матур осрашыуҙарға бай булды: кисә Әхмәтзәки Вәлиди исемендәге Республика милли китапханаһында билдәле яҙыусы Гөлфиә Юнысованың "Илһамлы яҙмыштар" китабының исем туйы булһа, бөгөн телсе ғалим Миңһылыу Усманованың "Башҡортса дөрөҫ һөйләйек!" тигән яңы китабы киң йәмәғәтселек иғтибарына тәҡдим ителде. Гөлфиә Иҙелбаеваның яңы китабына ингән очерктарҙың, интервьюларҙың күбеһе иң тәүҙә “Ватандаш“ журналында баҫылып сыҡҡайны. Улар өсөн Гөлфиә Аҙнағол ҡыҙы беҙҙең баҫманың йыл лауреаты итеп билдәләнде.Гөлфиә Аҙнағол ҡыҙы Юнысова "Гөлфиә апайҙың публицистик әҫәрҙәре лә, шиғырҙары кеүек, йырлап тора. Ул геройҙарын нисек бар, шулай һүрәтләй: арттырмай ҙә, кәметмәй ҙә. Юғиһә журналистикала хәҙер геройҙарҙы саманан тыш маҡтау, бөҙрә-бөҙрә һүҙҙәр, яҡын да килмәгән эпитеттар менән нарыҡлау таралып китте. Ҡайһы бер белгән кешең хаҡында уҡып, танымай ҙә тораһың. Ә бына Гөлфиә апай дөрөҫлөккә хилафлыҡ килтермәй генә шәхестәрҙе күтәрә белә, уларға һоҡланыу уята, яраттыра, – ти "Ватандаш" журналының баш мөхәррире Рәшиҙә Мәһәҙиева. – Биргән һорауҙары бик ябай ғына кеүек тәү ҡарашҡа, әммә уларға шундай ҙур мәғәнә һалынған: уйландыра ла, моңландыра ла...""Ватандаш" журналының баш мөхәррире Рәшиҙә Мәһәҙиева Миңһылыу Усманованың "Башҡортса дөрөҫ һөйләйек!" китабына ингән мәҡәләләр ҙә иң тәүҙә 2019 йылда "Ватандаш" журналында донъя күрҙе, ә автор үҙе баҫманың лауреаты итеп билдәләнде. "Телдәге һәр һөйләм, һәр һүҙ өсөн бөтөн йөрәге менән янып-көйөп йәшәгән ғалимә ул Миңһылыу Ғөбәйт ҡыҙы. Һәр кем үҙ урынында телде уның кеүек ҡайғыртһа һәм ҡулдан килгәнде эшләһә, бик күп хаталар булмаҫ ине" – баш мөхәррир Рәшиҙә Рәфҡәт ҡыҙының был һүҙҙәре менән килешмәү мөмкин түгел.Миңһылыу Ғөбәйт ҡыҙы Усманова БР Дәүләт Йыйылышы - Ҡоролтай депутаты Гөлнур Ҡолһарина менән Илһамлы яҙмыштарҙы күрә, уларҙың күңел донъяһын асып ҡыуана, уҡыусыларын ҡыуандыра белгән әҙибә Гөлфиә Иҙелбаева, һүҙ һәм телмәр сафлығы өсөн көрәшеүсе телсе ғалимә Миңһылыу Усманова, ошондай аҫыл заттарҙың хеҙмәт емешен халыҡҡа еткереүсе "Ватандаш" журналы – барыһы ла башҡорт телен, әҙәбиәтен тағы ла юғарыраҡ кимәлгә күтәреү, телдең ҡулланыу даирәһен киңәйтеү, уҡыусылар күңелендә билдәле шәхестәребеҙгә ҡарата ҡыҙыҡһыныу уятыу өсөн тырыша. Ошондай хеҙмәттәшлектең матур һөҙөмтәһе булған яңы китаптар баҫылыуы – икеләтә ҡыуаныс.