Билдәле башҡорт шағиры, яҙыусы, сәсән, журналист Мәүлит Ямалетдин вафат

Бөгөн ҡаты ауырыуҙан һуң билдәле шағир, яҙыусы, сәсән, ҡурайсы, Башҡортостан Республикаһының атҡаҙанған сәнғәт эшмәкәре, Муса Мортазин, Фәтих Кәрим, Мөхәмәтша Буранғолов исемендәге премиялар лауреаты, төрлө жанрҙағы ике тиҫтәнән ашыу китап авторы Мәүлит Ямалетдинов вафат булды.

Мәүлит Байгилде улы Ямалетдинов 1947 йылдың 5 февралендә Башҡортостан Республикаһының Учалы районы Аһылай ауылында колхозсы ғаиләһендә тыуған.

Хеҙмәт эшмәкәрлеген Баймаҡ ҡалаһындағы мәктәп-интернатта музыка уҡытыусыһы булып башлай. Артабан, Совет Армияһында хеҙмәт итеп ҡайтҡас, Сибай ҡалаһы мәктәп-интернатында йыр һәм музыканан уҡыта, Иҫке Сибай балалар музыка мәктәбенең директоры була. 1977—84 йылдарҙа Учалы районы Уралськ ҡасабаһында музыка мәктәбе директоры була.

1983 йылдан Яҙыусылар союзы ағзаһы. 1987 йылда Мәскәүҙә Юғары әҙәби курстарҙы, 2001 йылда ситтән тороп Башҡорт дәүләт университетын тамамлай. Учалы яҙыусылар ойошмаһында яуаплы сәркәтип була, Учалы районында милли-ижтимағи ойошманы етәкләй. “Ватандаш”, “Ағиҙел” журналдарында эшләй. Учалы Яҙыусылар ойошмаһы рәйесе була.

“Ватандаш”тар мәрхүмдең туғандарының һәм яҡындарының ауыр ҡайғыһын уртаҡлаша, уларға сабырлыҡ теләй!