Магнитофон таҫмалары
Әйләнә илай-илай.
Үткәндәрҙән, киткәндәрҙән
Унда әсәйем йырлай.
Көйләй-көйләй ҙә, тын ҡалып,
Һөйләп ала илай-көлә.
Әйтерһең, ул шулай беҙҙең
Хәтерҙәргә йәдкәр элә.
Тәсбих тартҡан һымаҡ, әсәй,
Һүҙҙәреңде берәм-берәм,
Ҡабат-ҡабат иҫләп сығып,
Күңелемә йыям, тирәм.
Моңдарыңды һеңдерәмен
Ҡорғаҡһыған йөрәгемә.
Һиҙгәнһеңдер көндәреңдең
Һалынғанын йәрәбәгә.
Юҡһа үҙәк өҙгөс итеп,
Һөйләп-көйләп ҡалмаҫ инең,
Мәңге онотолмаҫлыҡ итеп,
Хәтерҙәргә һалмаҫ инең.
…Магнитофон таҫмалары
Әйләнә илай-илай.
Киләсәккә, көткәндәргә
Унда әсәйем йырлай.